MRT-3, dalawang beses tumirik
MANILA, Philippines - Lunes ng umaga, habang rush hour ay dalawang tren ng Metro Rail Transit (MRT-3) ang tumirik kahapon na ikinainis ng libu-libong pasahero na na-late sa kani-kanilang mga trabaho at pupuntahan.
Nabatid mula sa MRT-3 control tower na ang unang aberya ay naganap sa pagitan ng GMA Kamuning at Cubao Stations Southbound alas-7:04 ng umaga.
Pinababa ang mga pasahero ng tren na nagkaproblema at pinalipat na lamang sa kasunod na tren.
Makalipas ang ilang minuto o ganap na alas-7:18 ng umaga, isa na namang tren ang nagka-aberya sa pagitan ng Cubao-GMA Kamuning sa bahagi naman ng Northbound.
Pinababa rin ang mga pasahero ng nasabing tren sa kabila ng kanilang pagmamadali para makapasok sa kani-kanilang mga trabaho. Ang dalawang tumirik na tren ay hinatak na lamang pabalik sa MRT-3 depo sa Quezon Avenue, Quezon City.
Naipon naman ang mga pasahero sa iba’t ibang istasyon ng MRT-3 habang ang iba ay naghanap na lamang ng ibang aternatibong masasakyan. Sinasabing technical problem ang sanhi ng magkasunod na aberya ng biyahe ng MRT-3.
- Latest