TCC Muay Thai Fighters andam na sa nasudnong torneyo
CEBU, Philippines - Andam na ang Muay Thai fighters sa Cebu City Muay Thai nga moharong sa tagsa-tagsa nila ka mga kontra sa ipahigayong National Muay Thai Championships karong Disyembre 16 didto sa Philsports Arena sa Pasig City.
Ang kalihukan magsilbe nga ayaganan alang sa mga miyembro sa nasudnong koponan nga moduwa sa mga internasyonal nga mga torneyo sunod tuig.
Si Muay Thai Association of the Philippines-Visayas head Master Benigno ‘Ekin’ R. Caniga Jr. nagkanayon nga inspirado sila nga mopakita sa tanan nilang abilidad human ang International Olympic Committee mipahibalo ning bag-o lang nga gihatagan nila ang sport nga Muay Thai og provisional recognition isip Olympic sport.
Tungod niini, ang mga Muay Thai organizations mahimo nang mangayo og tabang gikan sa IOC nga mohatag kanila og athlete development. Human sa tulo ka tuig nga provisional recognition, hingpit na nga masulod sa Olympics ang maong matang sa sports.
Si Caniga miingon nga daku og kahigayonan ang mga Pinoy sa maong sports ug posibleng sa Muay Thai magagikan ang dugay nang gihandum nga unang gold sa Pilipinas sa Olympics.
“Maka-dominate ta ani nga sport ilabi na sa smaller division pareha sa boxing. Naa ta’y natural gifts sa combat sports maong nindot nga balita para sa amoa nga masulod na ang Muay Thai sa Olympics,” matud pa ni Caniga.
Ang eight-man Team Cebu City pangulohan sa pag-umangkon ni Master Ekin ug international double gold medalist nga si Ken ‘Shaolin’ Caniga ug mixed martial arts veteran Roel ‘Akiyama’ Rosauro.
Molarga sila paingon sa Manila karong Miyerkules. (BANAT NEWS)
- Latest
