Cavs, Warriors nangapukan sa ilang korte

CEBU, Philippines - Mikuha og atensiyon ang Los Angeles Clippers sa pagpakgang niini sa tulo ka sagunson nilang pilde human ilang gipakugang ang defending champion Cleveland Cavaliers, 113-94 sa NBA kagahapon didto sa Quicken Loans Arena sa Cleveland, Ohio.

Sa gipakita nilang duwa, daw sa wala pa mahuwasi ang Cavs human sila gipakuratan sa Milwaukee Bucks niadtong Miyekules. Mao kadto ang labing unang higayon nga ang 13-4 Cavs nakatilaw og duha ka sunod-sunod nga pilde karong season.

“Those guys did a good job – they played desperate basketball, with them losing the last three,” matud pa ni Cavs superstar LeBron James agi’g pagdayeg sa Clippers.    “They played some good ball. We’ve got to figure it out, which we will.”

Human milabaw og otso puntos sa halftime, gitiwasan sa Clippers ang Cavs pinaagi sa paglusad og 13-2 run aron hingpit nilang makontrolar ang duwa.

Si JJ Reddick mipabuto og 23 puntos, samtang si Chris Paul miamot og 16 puntos alang sa Clippers.  Si Blake Griffin mihimo og 13 ka assists, samtang si DeAndre Jordan milangkat og 15 ka rebounds sa balanse nilang ataki.

“We played the right way,”  matud pa ni Paul.   “It was important for us to see what it felt like to win a game.”

Nangu sa Cavs mao si Kyrie Irving sa iyang 28 puntos, samtang si James nalimitahan ngadto lamang sa 16 puntos.

Gawas sa Cavs, ang Golden State Warriors napilde sab didto sa ilang balwarte human  pahagurosi sa Houston Rockets.

Apan ang Rockets nanginahanglan una og duha ka overtime sa wala pa maangkon ang 132-127 nga kadaugan.

Si James Harden mirehistro og triple-double sa Rockets uban sa iyang 29 puntos, 15 ka rebounds ug 13 ka assists. Si Ryan Anderson mitali sab og 29 puntos, samtang si Eric Gordon mikamada og 23 puntos ug lima ka rebounds sa Rockets nga miinat sa ilang baraha ngadto sa 11-7.

Si Kevin Durant mipabuhagay og 39 puntos ug 13 ka rebounds, si Stephen Curry mipatuasik og 28 puntos, samtang sila si Draymond Green ug Klay Thompson nagkumboya’g 35 puntos. apan nakawang ang ilang paningkamot kay ang Warriors nakatilaw sa ikaduha pa lang nila nga  pilde sa 18 ka duwa. (BANAT NEWS)