Temporaryong solusyon

Aniay maayong solusyon sa problema sa kagamhanan sa dakbayan sa Sugbo sa pagpangita niini og lugar nga kalabayan sa basura niining nagkaseryoso nga lakang pagpasira sa hagbay rang napuno nga Inayawan Sanitary Landfill. Si Mayor Eduardo Gullas sa silingang siyudad sa Talisay miingon nga uyon siya sa idea nga gamiton ang landfill sa maong dakbayan sa laing local government unit pagbubo sa ilang basura. Kini basta lamang nga adunay pagtugot gikan sa konseho sa dakbayan.

Dako na kini nga oportunidad alang sa siyudad sa Sugbo. Kay dili man lagi gusto si Mayor Tomas Osmeña nga mobalik pa ang dakbayan pagbubo sa basura niini didto sa usa ka pribadong landfill sa lungsod sa Consolacion, maayo kining deklarasyon ni Gullas.

Hinuon morag okay usab si Osmeña sa tanyag sa Talisay. Apan matud niya nga mas labing maayo nga moapil ang maong dakbayan sa bidding sa kagamhanan sa siyudad sa Sugbo alang niadtong mga tag-iya og landfill alang sa basura sa dakbayan.

Niining pag-alburoto karon sa Department of Environment and Natural Resources ug ubang environmental groups alang sa pagsira na sa Inayawan landfill tungod lagi kay milapas na sa balaud ang operasyon niini, nagkapuliki karon pagpangita og option ang kagamhanan sa Sugbo.

Kini ilabina kun modesisyon na gayud ang Court of Appeals alang sa pagsira na niini. Mao nang kinahanglan dalion na sa kagamhanan ang pagkab-ot og solusyon niining maong problema. Kini aron dili manimaho kitang mga molupyo sa magkatag unya nga basura sa kadalanan.

Sa akong nakita, duha ka alternatibong solusyon ang angay nga buhaton sa dakbayan sa problema sa paglabay sa basura niini. Ug kini mao ang pagbalik ngadto sa pribadong landfill sa Consolacion ug pagdawat sa tanyag sa Talisay paggamit sa landfill niini.

 Hinuon temporaryo lamang kini nga option hangtud nga makatukod na gayud og kaugalingong landfill ang dakbayan sa Sugbo niining pagsira na sa hangtud sa Inayawan landfill.