UC abante sa semis

CEBU, Philippines - Ang University of Cebu Junior Webmasters  miratsada sa nanghinapos nga bahin sa duwa aron pagpalagpot sa Don Bosco Technology Center Greywolves, 75-70  sa tagakay nilang duwa aron pag-angkon sa katapusang luna sa semifinals sa 16th Cebu Schools Athletic Foundation, Inc. men’s basketball tournament kagabii didto sa Cebu Coliseum.

Gawas nga gitagak ang Greywolves, ang Junior Webmasters miabante sab sa sunod nga hugna sa torneyo uban sa three-time defending champions Sacred Heart School-Ateneo de Cebu Magis Eagles, University of the Visayas Baby Lancers ug Cebu Eastern College Dragons.

Makapakurat ang gihimong pag-eskapo sa Junior Webmasters nga madasigong mibangon human malubong og 12 puntos sa nahabilin nga kuwatro minutos sa duwa.

Alkansi sa iskor nga 65-53 sa nahabiling 4:23, sila si Gelmart Umpad, John Bryl Cuyos, Jumike  Casera ug Kyle Ordeniza nagtambayayong aron pagbuto og 18-3 nga bomba nga wala lamang makapalabaw kanila og balik, 71-68, nakabugha sab sa dughan sa Don Bosco sa nahabilin nga 1:03 sa duwa.

Duna pa’y tsansa ang Greywolves nga makatabla o di ba kaha usbon ang dagan sa duwa pabor kanila dihang alkansi lang sila og dos puntos,70-72, apan wala sila kaugpo kay nakahimo og turnover atol sa ilang inbound play.

Sa tinguha nga mapugngan ang oras, dali nga gi-foul sa Don Bosco si Umpad sa nahabilin nga siyete segundos.

Usa lamang ang free throw nga napasud ni Umpad, apan mipahiyom gihapon kanila ang maayong palad gumikan kay si Casera maoy nakakuha sa offensive rebound ug dali sab dayon nga gi-foul sa Don Bosco.

Kay di na kabarog gumikan kay gibikugan si Casera, si Yannick Enriquez maoy mitira sa duha ka foul throws nga kalmado kaayo niyang gipasud aron pagselyado sa daog sa Junior Webmasters samtang nakapaminghoy og maayo sa Greywolves.

Lima ka UC players ang mitali og double figures ubos sa pagpangu ni Cuyos uban sa iyang 19 puntos. Si Casera mitali og 14, sila si Umpad ug Ordeniza dunay 12 puntos matag usa ug si Luigi Gabisan miamot og 10 sa Junior Webmasters nga mipakgang sa damgo sa Greywolves nga mohimo unta og kasaysayan. (BANAT NEWS)