Butch surveying miugkat og daog

CEBU, Philippines - Si Gerald Llanos mipabuto og 15   sa iyang 22 puntos sa fourth quarter alang sa Butch Surveying mga miugbok na sab og daog, ning higayona batok sa Explorer, 83-67 sa LABA President’s Cup 2016 Second Conference niadtong Lunes didto sa Barangay Banilad gym, dakbayan sa Mandaue.

Ang Butch Surveying nga gipanag-iya ni Engr. Butch Migriño nagbitbit na karon og 2-2 nga baraha.

Gawas sa iyang puntos,  si Llanos milangkat sab og 10 ka rebounds sa kadaugan.

Bugnaw pa kaayo ang aksiyon pagsugod hinungdan nga nagligas lang kini paghuman sa first period, 21-20 pabor sa Butch Surveying. Apan ubos sa pagtimon ni coach Rudy Candelada ug assistant niining si Tony Alcover,  kalit lang nga nabaskog ang Butch Surveying dihang si Geryl Bukiron miligwat og tulo ka 3-pointers sa abag ni Llanos aron molansang og 55-27 sa sayong bahin sa third period.

Si Bukiron miambit og 14 puntos, samtang si Caney Abarquez misansan og 10 puntos sa Butch Surveying.

Hinuon, ang dakung labaw napahakan ngadto sa 14 puntos dihang ang Explorer nakakita og buslot sa depensa sa Butch Surveying nga nakahimo sab og sunod-sunod nga turnovers.

Apan si coach Candelada mihimo og kausaban sa iyang game plan aron mapakgang ang rally nga gilusad sa Explorer.

Si Dante Orendain mihimo og double-double nga 16 points ug 11 rebounds aron pangulohan ang Explorer ni playing team manager Allan Buenavista, samtang si Al Yamomo mitikdol og 14 puntos.

Sa pasiunang duwa, ang Top V nangayo pa og overtime una nila mapilde ang Quiñahan, 98-93 aron magpabiling wa’y pilde sa upat ka duwa.

Si Rechel Bamba maoy nangu sa kadaugan pinaagi sa iyang 24 puntos. Sila si Ramil Estremos, Victor Pacquiao ug Loloh Sicad mihimo sab og double figures sa Top V ni Tophe Villalon.

Ang 1-2 nga Quiñahan gipangulohan ni Richard Madrid nga mipatuasik og pito ka tres sa kinatibuk-an niyang 30 puntos. Si Raymundo Carvajal mitampo’g 18 puntos ug si Marcial Marturillas mitimbre og 13 puntos.

Ang mga duwa gipadagan ni league commissioner Albert ‘Obeth’ Ramos inabagan nilang Lloyd Chavez, Richard Limosnero ug Willy Medillo ug ingon man nilang Louie Canen, Nestor Sullano Ruben Canen ug James Colis.

Puntos matag usa

Unang duwa:

TOP V (98) – Bamba 24, Estremos 16, Pacquiao 13, Sicad 12, Amaga 11, Cañete 7, Arreglo 4, Mauro 4, Dunque 3, Ceniza 2, Cinco 2.

QUIÑAHAN (93) – Madrid 30, Carvajal 18, Marturillas 13, Gonzaga 9, Oljol 4, Quiñahan 4, Costanilla 4, Landiza 4, Alburo 3.

Ikaduhang duwa:

BUTCH SURVEYING (83)  Llanos 22, Bukiron 14, Abarquez 10, Hatamosa 8, Alcover 5, Catinoy 4, Cuizon 4, Adolfo 4, Magale 2, Medillo 2, Gelbolingo 2, Ramirez 2, Lagaras 2, Anghay 2.

EXPLORER (67) – Orendain 16, Yamomo 14, Villarosa 9, Yatan 6, Lepon 6, Enad 6, Melana 4, Comendador 4, Buliag 2. (BANAT NEWS)