TNT di mokompiyansa sa Meralco sa Game 2

CEBU, Philippines - Nasayod si TNT KaTropa coach Jong Uichico nga sila ang gipaboran nga modaog sa serye batok sa ilang sister-team nga Meralco Bolts, apan dili sila angay mokompiyansa tungod kay grabe ka delikado ang Bolts.

Ang TNT misakmit sa Game-1 sa dominanteng paagi, 113-95 niadtong Martes ug laraw nila nga moposte og 2-0 nga bentaha karong gabii didto sa Smart Araneta Coliseum.

Si Uichico nagtuo nga adunay katakus ang Meralco ni coach Norman Black nga mobangon ug ila kining likayan pinaagi sa pagpilde.

Gidasig ni Uichico  ang  duha nila ka imports nga sila si Michael Madanly ug Mychal Ammons nga mopakita sa ilang abilidad sama sa gihimo niini sa Game-1. Ang Asian import nga si Madanly maoy nangulo sa scoring sa iyang 22 puntos, samtang si Ammons maoy kasaligan sa depensa ug rebounds.

Mas motaas pa usab ang tsansa sa TNT nga makuha ang 2-0 nga bentaha kun makabawi na ang iyang star player nga si Jayson Castro karong adlawa. Si Castro igo lang nakahimo og 14 puntos.

Bantayanan sa TNT mao ang veteran import nga si Allen Durham, kinsa mibahad  nga buhaton niya ang tanan aron matabangan ang Meralco nga makatabla sa serye. (BANAT NEWS)