New Millennium Hardware nidaog na gyud sa LABA
CEBU, Philippines - Nidaog na gyud ang New Millennium Hardware sa ikatulo nilang duwa dihang ilang gipakuratan ang AFN Realtor, 108-92 sa LABA President’s Cup 2016 Second Conference niadtong Septiyembre 19 didto sa Barangay Banilad gym, dakbayan sa Mandaue.
Ang New Millennium Hardware nga aduna na’y 1-2 record, gipangulohan ni Tawing Grafe nga miariya og 21 puntos, gisundan ni Canjo Echavez nga adunay 20 puntos ug Ariel Ocier sa iyang 11 puntos.
Wala sab magpaalkansi si LABA president Gilbert Sebandal ug playing coach Lou Ornopia nga parehong mitampo’g 10 puntos ug adunay tagtulo ka 3-pointers.
Lain pang mirehistro og 10 puntos mao sila si Adie Cinco ug Lloyd Chavez aron tabangan ang New Millennium Hardware nga makabangon human masukarap sa unang duha nila ka duwa.
Ang team manager sa AFN Realtor nga si Arnold Pestaño mao mismo ang nangulo sa napilde niyang koponan sa iyang 21 puntos.
Ang mga duwa gidumala ni league commissioner Albert ‘Obeth’ Ramos inabagan nilang Lloyd Chavez ug Willy Medillo.
Puntos matag usa
New Millennium Hardware (108) – Grafe 21, Canjo 20, Ocier 11, Sebandal 10, Ornopia 10, Cinco 10, Chavez 10, Pacquiao 9, Ubas 4, Asis 2.
AFN Realtor (92) – Pestaño 21, Tantuan 15, Ygoña 11, Recto 8, Limosnero 6, Aton 6, Mingane 5, Borces 5, Dawal 5, Cena 4, Auman 2, Tupas 2. (BANAT NEWS)
- Latest
