UV, SHS-Ateneo nanghawod sa eliminasyon
CEBU, Philippines - Ang University of the Visayas ug Sacred Heart School-Ateneo de Cebu maoy nanghawod sa eliminasyon ubos sa Small Basketeers Philippines division sa SBP Passerelle Tournament nga gipaluyohan sa Milo.
Gipukan sa UV ang SHS-Ateneo A, 36-29 aron pag-angkon sa numero unong puwesto uban sa ilang biktima bitbit ang managsama nilang 4-1 nga baraha.
Samtang klaro na ang nag-unang duha ka dapit, sikit ang kumbati alang sa ikatulo ug ikaupat nga luna sa semifinals tali sa University of San Carlos (2-2), Don Bosco (1-3), SHS-Ateneo B (1-3) ug Southwestern University-Phinma (1-3).
Ang SHS-Ateneo B midaog batok sa SWU-Phinma, 58-23, samtang ang Don Bosco mipakgang sa SWU-Phinma, 44-15.
Sa laing mga duwa, ang SHS-Ateneo A mibuntog sa USC, 55-25 nga maoy nakatagak sa USC ngadto sa ikatulong dapit.
Sa Passerelle division, si Joshua Canoy mipasud sa duha niya ka free throws sa nahabilin nga 10 segundos sa duwa aron pag-aswat sa UV ngadto sa 30-28 nga kadaugan batok sa Don Bosco. Ang UV miinat sa wa’y tatsa nilang rekord ngadto sa 5-0.
Sa laing duwa Passerelle division, ang SWU-Phinma miposte og sunod-sunod nga daog batok sa Abellana National School, 55-47 ug USPF, 69-61, samtang ang SHS-Ateneo milampurnas sa USC, 69-39, alang sa ikaupat niining sagunson nga daog. (BANAT NEWS)
- Latest
