Eliminasyon sa 16th CESAFI basketball tapuson karon

CEBU, Philippines - Ang double round elimination ubos sa collegiate division sa 16th Cebu Schools Athletic Foundation, Inc. men’s basketball tournament matapos na karong adlawa diha sa Cebu Coliseum.

Makigtakus ang University of the Visayas (UV) Green Lancers batok sa University of Southern Philippines Foundation (USPF) Panthers sa pasiunang duwa nga gikatakda sa alas-5:15 sa hapon, samtang ang University of San Jose-Recoletos Jaguars mohamag sa Cebu Institute of Technology-University (CIT-U)   Wildcats  sa  main game   sa   alas-6:30   sa gabii.

Ang USJ-R, UV ug defending champion University of San Carlos (USC) Warriors segurado nang dunay ‘twice-to-beat’ advantage unya sa quarterfinal playoffs sunod semana.

Ang Jaguars nga kasamtangang nagbitbit og 8-3 win-loss record, lagmit maoy motapos isip No. 2 sunod ang UV (7-4) ug USC (6-6).

Sa maong plastada, ang Jaguars makigtakus sa Wildcats (1-10) sa sunod nga hugna, samtang ang Lancers ug Warriors makighamag sa Panthers (3-8) ug University of Cebu (UC) Webmasters (3-9).

Ang mga mananaog motikang dayon sa semifinals uban sa Southwestern University-Phinma Cobras nga mikumpleto og impresibong 12-0 sweep. (BANAT NEWS)