Lagmit mag-abot
CEBU, Philippines - Ang duha ka Pinoy’ng kampiyon nga sila si Marlon ‘The Nightmare’ Tapales ug ‘King’ Arthur Villanueva lagmit mag-abot sa ibabaw sa ring kun ugaling magpadayon ang nindot nga dagan sa ilang karera sa boksing.
Kun mahitabo, mao kini ang labing unang higayon nga mag-unay ang duha ka Pinoy sukad si Pancho Villa midepensa sa iyang world flyweight title batok sa kababayan niining si Clever Sencio niadtong 1925.
Si Tapales (29-2, 12KOs) mao ang kasamtangan WBO bantamweight champion, samtang si Villanueva (30-1-0, 16KOs) nga mao ang WBO Asia-Pacific bantamweight champion, maoy iyang No. 1 contender.
Si Tapales, nga misakmit sa titulo human gipukan ang kanhi wa’y pildeng Thai champ nga si Pungluang Sor Singyu niadtong Hulyo 27 didto sa Thailand, modepensa sa iyang korona batok ni Takuma Inoue sa Japan karong Disyembre 30 didto sa Korakuen Hall sa Tokyo.
Samtang si Villanueva mipakamang ni Juan Jimenez sud lamang sa duha ka hugna niadtong Domingo didto sa StubHub Center sa Carson, California.
Kun ugaling modaog si Tapales batok ni Inoue, hayan nga dili magdugay mamahimo niyang mandatory challenger si Villanueva.
Bukas hinuon sa maong posibilidad ang duha ka kampo.
“If that happens, we will have no choice but fight him (Tapales)”, matud pa sa promoter ni Villanueva nga si Michael P. Aldeguer sa dihang nahinabi ni Dong Secuya sa Philboxing.com.
Susama sab ang panahom ni Cebuano promoter Rex ‘Wakee’ Salud, ang manedyer ni Tapales, nga gusto ang ALA Promotions maoy mo-promote sa away uban sa kondisyon nga dalitan sila og maanindot nga tanyag.
“It happens in Mexico, in Japan, everywhere. So it’s good if it also happens in the Philippines. But they (ALA Promotions) have to promote the fight. And they should give us a good offer,” dason pa ni Salud sa susamang taho ni Secuya. (BANAT NEWS)
- Latest
