Dragons sud sa semifinals, Greywolves buhi pa

CEBU, Philippines - Ang Cebu Eastern College Dragons mi-abante na sa semis, samtang ang Don Bosco Technology Center Greywolves nakaangkon pa og laing kinabuhi human gilabhan ang tagsa-tagsa nila ka mga kontra sa quarterfinal playoffs sa 16th Cebu Schools Athletic Foundation, Inc. men's basketball tournament sa Cebu Coliseum kagahapon.

Yano rang gipabakasyon sa Dragons ang University of San Jose-Recoletos Baby Jaguars, 72-55, aron pagselyado og luna sa Final 4, samtang ang Greywolves miresbak sa twice-to-beat University of Cebu Juniors Webmasters, 77-64, aron pagpahayag sa ilang kampanya nga makalayat sa semis sa labing unang higayon sa ilang kasaysayan.

Si Kieth Manlapat mitali og 18 puntos sa Dragons nga nakigduyog na karon sa three-time defending champions Sacred Heart School-Ateneo de Cebu Magis Eagles ug University of the Visayas Baby Lancers sa sunod nga hunat sa kompetisyon.

Ila unyang ikasangka sa laing hunat sa kumbati ang modaog sa tinaktakay nga duwa tali sa Greywolves ug Junior Webmasters karong Huwebes.

Sama sa Dragons, dominado sa Greywolves ang duwa. Mikolapso man tuod sila human makalabaw og 22 puntos, 40-22, sa sayong bahin sa ikatulong kuwarter apan nakabawi ra sab dayon aron panimaslan ang 60-69 nilang kaparotan sa Junior Webmasters sa una nilang engkuwentro. (EBV)(BANAT NEWS)