CEC, UC JRS. semis ang tirada

CEBU, Philippines - Pagbira og luna sa semifinals maoy gitinguha sa Cebu Eastern College Dragons ug University of Cebu Junior Webmasters sa ilang pakigsangka batok sa managlahing kontra sa  quarterfinal playoffs sa 16th Cebu Schools Athletic Foundation. Inc.  karon  diha sa Cebu Coliseum.

 Laraw sa Dragons  nga usban ang University of San Jose-Recoletos   Baby Jaguars sa ilang panag-abot sa ala-1 sa hapon, samtang ang Junior Webmasters mao sab ang tuyo batok sa Don Bosco Technology Center   Greywolves sa ilang  sangka sa alas-2:30 sa hapon.

Parehong adunay twice-to-beat advantage ang Dragons ug Junior Webmasters gumikan kay sila man maoy mipatong sa ikatulo ug ikaupat nga puwesto human sa eliminasyon.     Ang CEC, UC ug DBTC nagtabla gyud unta sa managsamang 6-3 nga baraha, apan ang Dragons maoy miguwa nga no. 3 qualifier gumikan kay gipakgang man niini ang UC  ug  DBTC. Ang Junior Webmasters maoy mitapos isip No .4 gumikan kay midaog man sila sa DBTC.

Kun magmadaugon, ang CEC ug UC momartsa ngadto sa semifinals uban sa three-time defending champions Sacred Heart School-Ateneo de Cebu (SHS-AdC) Magis Eagles ug University of the Visayas (UV) Baby Lancers. (BANAT NEWS)