Nietes, Sosa mipasalig og eksplosibong aksiyon

CEBU, Philippines - Si two-division world champion Donnie ‘Ahas’ Nietes sa ALA Boxing Gym ug ang Mehikano niining kontra nga si ex-WBC light flyweight champion Edgar Sosa parehong mipasalig og eksplosibong aksiyon sa ilang sangka nga maoy main event sa “Pinoy Pride 38: Philippines vs. Mexico” karong Domingo (oras dinhi sa Pilipinas) didto sa StubHub Center sa Carson, California.

Nagpanikad na si Nietes sa iyang flyweight debut uban ang tumang kadasig nga sa dili madugay moangkon siya sa ikatulo nilang world title sa managlahing weight division.

Ang duha ka boksidor nag-abot kagahapon atol sa final press conference sa ikatulong Pinoy Pride event sa ALA Promotions ug ABS-CBN Sports didto sa Carson Community Center.

Nagkanayon si Nietes (38-1-4, 22KOs) nga komportable siya karon sa bag-o niyang timbang.

Madugay-dugay pa hinuon nga matuman ang iyang gidamgo nga away batok ni Juan Francisco Estrada kay ang nauwahi boluntaryo man nga mihubo sa iyang duha ka bakus isip WBA ug WBO flyweight aron mosaka sa super flyweight sa tuyo nga gukdon ang pound-for-pound king nga si Roman Gonzalez.

Sa iyang bahin, si Sosa (52-9, 30KOs) mibahad nga mohimo impresyon batok ni Nietes. (BANAT NEWS)