PCBL mopahigayon og duwa sa Sugbo
CEBU, Philippines - Ang Pilipinas Commercial Basketball League modala og upat ka teams dinhi sa Sugbo aron moduwa og bearing games ubos sa PCBL 3rd Conference nga tentatibong gikatakda karong Oktubre 21-23.
Ang PCBL bag-ong natukod nga liga sa amateur basketball kansang tumong mao ang paghashas sa abilidad sa mga Pinoy’ng basketbolista gikan sa probinsiya.
Si PCBL chairman Buddy Encarnado mipahibawo ning maong kalamboan sa dihang nahinabi sa mga tigbalita atol sa duwa sa CESAFI diin siya misaksi niadtong Huwebes sa Cebu Coliseum.
Personal nga mianhi sa Sugbo si Encarnado aron sugdan ang sabot-sabot kabahin sa iyang plano nga himuon ang PCBL nga usa ka nasudnong liga.
Lakip sa iyang gihimamat mao sila kongresista Gerald Anthony ‘Samsam’ Gullas Jr., nga maoy team manager sa University of the Visayas basketball, businessman/sportsman Gerry Oberes, kansang Emil’s Cup maoy nagbuhi sa Cebu commercial basketball sud sa dul-an sa usa na ka dekada ug league organizer Val Halen Parmis, kansang dedikasyon pag-organisar og mga liga bisan sa hilit nga probinsiya sa Kabisay-an ug Mindanao nakapadasig ni Encarnado nga palambuon ang PCBL gawas sa Metro Manila.
Si Encarnado, nga kanhi top executive sa PBA sa dihang nagrepresenta pa siya sa Sta. Lucia Realtors, nagkanayon nga naglantaw siya sa unahan nga makatrabaho ang mga Sugbuanon niyang partners bitbit ang tinguha nga mabaid ang talento sa mga basketbolista lukop nasud ubos sa hiniusa nilang puwersa.
Mitug-an si Encarnado nga ang pagdala sa PCBL dinhi sa Sugbo kabahin sa mas daku nilang plano nga palapdan ang liga sa nagkadaiyang dapit ilabi na sa Cebu, Leyte ug ubang dapit sa Mindanao.
“Hopefully sometime next year as early as January, we have to create PCBL Cebu and perhaps in Leyte then revive PCBL Davao by that time,” sumala pa ni Encarnado. (BANAT NEWS)
- Latest
