Cobras, Lancers mag-abot na sab sa CESAFI
CEBU, Philippines - Seguradong dumot nga pinaksitay ang mahitabo sa dihang mag-abot og usab ang mortal nga managkaribal, Southwestern University-Phinma Cobras ug University of the Visayas Green Lancers sa 16th Cebu Schools Athletic Foundation, Inc. men’s basketball tournament karong adlawa diha sa Cebu Coliseum.
Ang ilang sangka gikatakda sa alas-4 sa hapon, human sa laing duha ka collegiate matches tali sa University of San Carlos Warriors batok sa Cebu Institute of Technology-University Wildcats sa ala-1 sa hapon ug sa University of San Jose-Recoletos Jaguars batok sa Southern Philippines Foundation Panthers sa alas-2:30 sa hapon.
Ang Cobras maoy inilog kay wala pa’y pilde sa 11 ka duwa, samtang ang Lancers nakigsawo karon sa ikaduhang dapit uban sa Jaguars sa managsama nilang 7-3 nga baraha.
Labaw sa pagpanimawos sa 57-65 nilang kapildihan sa Cobras niadtong Septiyembre 1, ang Lancers naglaraw nga hugawan ang limpiyong rekord sa SWU nga seguradong makahatag kanila og dugang kadasig sa sunod nga bahin sa torneyo.
Atol sa miagi nilang sangka, ang Lancers maoy kanunay nga naglabaw, apan nahagba kini taliwala sa agresibong opensiba sa Cobras ubos sa pagpangu nilang two-time MVP Mark Jayven Tallo ug eksplosibong rookie nga si Sir Shaquille Imperial. Ang duha mao gihapon ang angay bantayan sa Lancers.
Uban sa import nilang si Quentin Nzuzi, lain pang pambato sa Cobras mao sila si Bernie Bregondo, Jiovannie Luz, Anton Pardo, Mark Racho, Ian Ortega ug William Polican.
Pangulohan sa ilang Liberian import nga si Bassieru Sackor, ang Lancers maglaum sab nilang Rey Suerte, Alfred Codilla, Josue Segumpan, Tristan Albina ug Sheldon Gahi. Lain pa nilang masandigan mao sila si Jayson Balabag, Michael Macion, Monic Soliva, Jerome Napao ug Michael Maestre. (BANAT NEWS)
- Latest