Ang pagkaplag sa sunod nga marathon Olympian

CEBU, Philippines - Sa  ika-40  na ka tuig, ang Cebu leg sa National Milo Marathon padayon sa ilang ambisyon nga makakaplag pa og mga   Olympians ugma damlag sa nasud nga mosunod sa lakang ni Mary Joy Tabal, ang labing unang Pinay marathoner nga midagan sa Olympics.

Sa makausa pa, mabulit na sab og kolor berde ang kadalanan  dihang 15,000 ka mga runners ang gipaabot nga managan sa usa sa labing gipaabot nga running event sa Sugbo ugma sa buntag nga manukad sa tugkaran sa Cebu Normal University ug matapos  sa Cebu City Sports Center.

Sa pagkakaron, anaa na sa 860 ka runners ang nagpalista sa 3K, 12,970 sa 5K, 535 sa 10K ug 683 sa 21K, nga mao ang qualifying distance alang sa national finals nga gitakda sa Disyembre didto sa dakbayan sa Ilo-ilo.

“This edition is so memorable because not only that we are in our 40th year, but also, many things have been achieved by Milo Marathon and that includes producing the first ever Filipina marathon Olympian in Mary Joy,” matud pa ni Ricky Ballesteros, ang Cebu leg organizers atol sa paglusad sa maong kalihukan  kagahapon didto sa Cebu Grand Hotel.

Si Tabal midasig usab ilabi na sa mga batan-on  nga mosalmot sa Milo Marathon nga iyang gihulagway nga duol sa iyang kasingkasing human kini maghatag kaniya og kahigayonan nga matuman iyang damgo isip usa ka Olympian.

“Milo Marathon became my venue in achieving the success of my career. I want the young athletes to experience what Milo has done to my life and that is making my dreams come true,” matud pa ni Tabal, kinsa mopadagan usab sa 50 niya ka mga batan-ong runners nga iyang gi-trade sa Cebu City Sports Commission grassroots program.

Sa iyang bahin, si Andrew Neri, ang Milo Sports marketing manager, misaysay nga daku og natampo ang Cebu leg sa kalampusan sa labing karaang marathon sa nasud.

“We are really excited and at the same time nervous when its the Cebu leg because this is our biggest regional leg,” matud pa niya. “This leg produced Mary Joy Tabal and with that, Milo has lived to the saying ‘Great things start from small beginnings’ which Joy showed in his career.”

Sa mga gusto mo-qualify alang sa national finals, ang 21K runner kinahanglan nga motapos sa lumba sud sa usa ka oras ug 15 minutos alang sa mga male runners ug 1:35:00 sa female runners. Kun mo-qualify, aduna sila’y all-expense paid trip paingon sa Ilo-ilo alang sa national finals.

Gawas sa maong pribilihiyo ug ganting salapi, ang 2016 Milo Marathon King and Queen ipadala usab og usa ka international marathon ning tuiga. Wala pa’y  tukmang petsa ug  kun asa nga marathon sila ipadala sa Milo Philippines, apan mga gipilian mao ang Tokyo, London, South Korea ug Ontario, Canada Marathon.

Sa laing bahin, ang Milo padayon usab sa ilang advocacy nga “Help Give Shoes” diin 600 ka pares sa mga running shoes ang gipanghatag ngadto sa mga kabus nga tinun-an sa napiling mga pampublikong eskuwelahan dinhi sa Sugbo. (BANAT NEWS)