Oporto, Alvarez hawod sa 210K ultramarathon
CEBU, Philippines - Milahutay sila si Rhoda Oporto ug Bayani Alvarez nga maoy midaog sa Cebu Southwest Ultramarathon, usa ka makutas nga 210K ultramarathon sa miaging adlaw nga nanukad didto sa Santander ug natapos diha sa Plaza Independencia.
Ang 44-anyos nga si Oporto nga kuwang og preparasyon maoy labing paspas nga female long-distance runner human niya gitapos ang lumba sud sa 44 ka oras ug 37 segundos.
Si Oporto usa sa mga nangiwit atol sa unang 10 kilometros, apan kalit siyang misutoy sa ika-50 ka kilometro ug gikan didto wala na lingia pa ang ubang female runners.
Sa iyang bahin, si Alvarez maoy overall champion ug hari sa men’s class human siya milabang sa finish line sud sa 26 ka oras ug 30 minutos. Napuhalan niya ang laing multi-titled ultramarathoner nga si Brian Guillen nga mitapos sa lumba sud sa 28 ka oras.
Si Virgilio Undaloc maoy ikatulo sa iyang 32 ka oras ug 45 minutos. Sila si Lorginson Gaso (39:35) ug Edwin Silagan (42:32) maoy mikompleto sa top five finishers. (BANAT PALARO)
- Latest