Tabanao nahuboa’g bakus
CEBU, Philippines - Nalangkatan si Neil John Tabanao sa RWS Stable sa iyang WBO Oriental featherweight title human miyukbo ngadto sa wa’y pidleng African champion nga si Isaac Dogboe pinaagi sa unanimous decision sa ilang unification bout kagahapon didto sa Police Officer’s Social and Fitness Centre sa Accra, Ghana.
Gawas nga gihiusa ang WBO Oriental ug Africa titles, gisakmit sab ni Dogboe ang korona isip WBC Youth 126-pound champion.
“Ligas man ang duwa. Sila man gud ang host mao sila daog pero pilde gyud ta,” matud pa sa trainer ni Tabanao nga si Brix Flores.
Gumikan niini, ang paghari ni Tabanao isip regional champion milanat lamang og duha ka bulan. Iyang gibira ang WBO Oriental human gipalukapa si Ibrahim Balla sa ikatulong hugna niadtong Hunyo 11 didto sa Bendigo Stadium sa Victoria, Australia.
Mao kadto ang ikaduha nga pilde ni Tabanao sa 15 ka away uban ang 9KOs, samtang si Dogboe nga usa ka kanhi Olympian, miinat sa wa’y tatsa niining rekord ngadto sa 15-0 uban ang 9KOs. (BANAT PALARO)
- Latest
