Magis Eagles midagit sa Greywolves
CEBU, Philippines - Gipakita na sa three-time champions Sacred Heart School-Ateneo de Cebu Magis Eagles ang ilang kahawod dihang ilang gilat-an og 25 puntos ang kanhi wa’y pildeng Don Bosco Technological Center Greywolves, 73-48 sa 16th Cebu Schools Athletic Foundation, Inc. (CESAFI) men’s basketball tournament kagahapon didto sa Cebu Coliseum.
Impresibo na sab nga teamwork ang gihikyad sa Magis Eagles diin tanan players niini gawas lang ni Koko Tuadles ang nakatampo sa pinuntosay ug ingon man sa uban nga aspeto sa duwa.
Si Eroll Pastor mitusik og 12 puntos, samtang si Andrew Velasco mipupo’g 10 puntos sa Magis Eagles nga nakigsawo na karon sa liderato sa juniors division uban sa ilang biktima bitbit ang managsamang 4-1 win-loss records.
Sila si Jed Colonia ug Emilio Lapiña nagkumboya’g 17 puntos sa Magis Eagles nga wala na manumbaling sa Greywolves human kini nila gibiyaan sa unang kuwarter sa iskor nga 27-9.
Misamot pa ang kabangis sa Magis Eagles dayon na ngadto sa pag-inat sa ilang labaw ngadto sa 26 puntos sa halftime, 44-18.
Hingpit nga gipalukapa sa Magis Eagles ang nagkagidlay nga Greywolves human kini nila gilubong og 37 puntos, 71-34 sa nahabilin nga kuwatro minutos sa duwa.
Si Alje Mendez adunay 19 puntos ug si Ken Gato mitali og 11 alang sa Greywolves nga naminghoy human nabugto ang upat ka sagunson nilang daog. (BANAT PALARO)
- Latest
