SBP Passerelle games sugdan na
CEBU, Philippines - Trese ka teams ang mag-ilog sa korona sa dihang ang ika-31 nga edisyon sa SBP Passerelle Basketball Tournament nga gipaluyohan sa Milo mosikad na karong adlawa didto sa Magis Eagles Arena sa Sacred Heart School-Ateneo de Cebu sa Barangay Canduman, dakbayan sa Mandaue.
Mangu sa mga entranteng koponan mao ang defending champion University of the Visayas (UV) sa Small Basketeers Philippines (SBP) division ug Sacred Heart School-Ateneo de Cebu (SHS-AdC) sa Passerelle.
Mohagit sa UV ubos sa SBP category mao ang University of San Carlos (USC), SHS-Ateneo de Cebu A, Don Bosco Technology Center (DBTC), Southwestern University-Phinman (SWU-P) ug SHS-Ateneo B.
Samtang makigtige sa SHS-Ateneo sa Passerelle mao ang USC, UV, University of Southern Philippines Foundation (USPF), SWU-Phinma, Don Bosco ug rookie team Abellana National School (ANS). Ang pagsalmot sa Abellana kabahin sa outreach assistance program sa BEST Center ngadto sa mga pampublikong tunghaan.
Ang Cebu champion moabante ngadto sa Visayas Regional Finals karong Nobiyembre didto sa Roxas City. Ang mananaog mao sab dayon ang morepresentar sa rehiyon sa SBP Passerelle National Finals nga ipahigayon didto sa dakbayan sa Bacolod karong Disyembre. (BANAT PALARO)
- Latest