Cebu Founding Anniversary Run modalit og P150T nga ganti

CEBU, Philippines - Miabot ngadto sa P150,000 nga ganting salapi ang giandam aron ipremyo ngadto sa mga mananaog sa ipahigayong 447th Cebu Province Founding Anniversary Run karong Domingo nga magsugod ug mahuman didto sa hawanan sa Kapitolyo sa Sugbo.

Ang labing daku nga bahin adto mapunta sa mga manghawod sa 20-kilometer open, diin ang men’s ug women’s champion sa local ug foreign category mobulsa og P10,000 matag usa. Ang mopahiluna sa ikaduha ug ikatulong dapit modawat og P7,000 ug P5,000.

Sa 10K all-local category, ang top 3 men ug women finishers moangkon og parehong premyo nga  P5,000, P3,000 ug P2,000.

Ang top 3 sa 5K grassroots division gantihan og  P3,000, P2,000 ug P1,500, samtang ang tulo ka labing paspas sa 3K modawat og P2,000, P1,500 ug P1,000.

Sa espesyal nga kategoriya alang sa mga empleyado sa Kapitolyo, ang top 5 modawat

og P5,000, P3,000, P2,000, P1,500 ug P1,000. Kadtong maapil sa top 10 adunay konsolasyon nga P500 matag usa.

Sa pagka karon, 600 na ang nagparehistro, apan si Lyle Larida sa Cebu Provincial Sports Commission nagkanayon nga motubo pa ang maong numero lagmit ngadto sa kapin sa 1,000 sa adlaw unya sa lumba ilabi na kay modawat pa sila og on-site registration. (BANAT PALARO)