Greywolves vs. Eagles
CEBU, Philippines - Bitbit ang 4-0 nga baraha, ang Don Bosco Greywolves mao na lang ang wa’y pildeng koponan sa juniors division, apan ang ilang katakus masukod sa dihang ilang sangkaon ang three-time defending champions Sacred Heart School-Ateneo de Cebu Magis Eagles karong adlawa sa nagkainit nga aksiyon sa 16th Cebu Schools Athletic Foundation, Inc. men’s basketball tournament didto sa Cebu Coliseum.
Bisan tuod anaa kanila ang momentum, ang Greywolves angay nga mangandam alang sa usa ka dakung sangka gumikan kay pader man ang ilang banggaon nga mao ang Magis Eagles karong ala-1 sa hapon.
Andam hinuon nga moatubang ang Greywolves sa bisan unsang hagit nga nagpaabot kanila ilabi na kay anaa sa ilang poder sila si Ken Gato, Alje Mendez, Geo Ibero, Grenald Malubay, Jomari Ranuco, Reinnel Gabisay ug Jan Mangaron.
Lauman sab nila sa ilang tinguha nga inaton ang labing nindot nilang sinugdanan ngadto sa 5-0 mao sila si Christian Boyboy, John Damolo, Juan Miguel de la Torre, John Jocamis, Rommel Jumao-as, Jeslar Larumbe ug Francis Tado.
Samtang ang Magis Eagles nga nagtangag og 3-1 win-loss record, magsandig nilang Jed Colonia, Eroll Pastor, Andrew Velasco, Travis Mantua, Koko Tuadles, Christian Manaytay ug Alex Visser. Mahimo sab silang mokuot sa opensa nilang Phil Calumpang, Benedict Andrei Chua, Patrick Yu, Ramon Lapiña, Justin Javelosa, Emilio Nacua ug John Benedict Yu.
Sa lain pang mga duwa sa juniors division, ang University of the Visayas Baby Lancers (2-1) nanghinaut nga mobangon sa miagi nilang kapildihan sa ilang pakighamag sa Cebu Eastern College Dragons (3-1) sa alas-2:30 sa hapon, samtang ang Cebu Institute of Technology-University Wildkittens ug USC Baby Warriors nga parehong huyhoy ang abaga human sa upat ka duwa, mag-abot sa alas- 4:30 sa hapon.
Sa bugtong aksiyon sa collegiate division, ang SWU Cobras (4-0) naglaraw nga magsolo sa liderato sa pakigbatok nila sa UC Webmasters (2-2). (BANAT PALARO)
- Latest
