Durham bida kadaugan sa Meralco
CEBU, Philippines - Puwerteng paningkamot ni import Allen Durham aron hatagan ang Meralco Bolts sa ikalima niining daog sa PBA Governors’ Cup.
Ang veteran import miiskor og 31 puntos uban sa 17 ka rebounds ug lima ka assists alang sa Meralco nga mipukan sa ilang igsuong koponan NLEX Road Warriors, 101-95 didto kagabii sa Smart Araneta Coliseum.
Si Durham nakapundo nang daan og 18 puntos sa first half diin ang Meralco milabaw 44-36, apan nakatabla ang NLEX sa pagpangulo nila ni Asi Taulava ug Eman Monfort, 84-all sa sayong bahin sa final period.
Hinuon, ang Meralco misandig sa ilang depensa aron pugngan ang laing scoring rally sa NLEX. Nalimitahan nila ang high-scoring import nga si Henry Walker nga miiskor og 27 puntos, apan wala kaayo kaigo sa krusyal nga minutos sa duwa.
Sa maong kadaugan ang Meralco (5-3) daku og purohan nga makasud sa playoff, samtang ang NLEX (3-4) kinahanglan pang modaog sa sunod nilang mga duwa. (BANAT NEWS)
- Latest