Tapales dili moatras

CEBU, Philippines - Ang bag-ong WBO bantamweight champion nga si Marlon ‘The Nightmare’  Tapales sa Rex ‘Wakee’ Salud miingon nga dili siya moatras sa bisan unsang hagit ug harungon ang labing maayong boksidor sa iyang dibisyon.

“Gusto nako nga awayon ang labing maayo. Bisa’g kinsa akong kontra ug bisan asa ang away akong dawaton. Hinuon mag-agad ra ko sa akong manedyer nga si Sir Wakee Salud,” matud pa ni Tapales.
Ang 24-anyos nga si Tapales misulbong ngadto  sa halangdong dapit sa Philippine boxing sa dihang mibangon siya human matumba duha ka higayon sa ikalimang hugna dayon na ngadto sa pagpatikangkang ni two-time world champion Pungluang Sor Singyu sa ika-11 nga hugna aron pagsakmit sa WBO title niadtong Miyerkules didto sa  Ayutthaya, Thailand.

Dihang gisukna kun unsay nasud sa iyang huna-huna niadtong higayona diin siya nalukapa, si Tapales mitubag nga iya rang gisultian ang iyang kaugalingon nga mobarog dayon ug dili mosurender.
Mitug-an si Tapales nga nasakitan gyud siya sa body shot ni Sor Singyu sa unang higayon nga siya natumba. “Sa ikaduhang higayon, gituyo na to nako nga magpatumba kay gusto nako nga makapahuway ug makakuha og hangin gamay,” dason pa ni Tapales. Apan sa maong higayon tensiyonado na ang iyang corner ubos sa pagtimon nilang Fernando Ocon ug Brix Flores.
“Nahadlok gyud ko og maayo kay mao to’y unang higayon nga nakita nako nga natumba akong anak,”  matud pa sa inahan ni Tapales nga si Maria. (BANAT PALARO)