Tepora andam na
CEBU, Philippines - Giandam na ni WBO Asia Pacific Youth super bantamweight champion Jhack ‘The Golden Boy’ Tepora (17-0, 12KOs) sa Omega Boxing Gym ang iyang kaugalingon alang sa dakung gubat batok ni Bryan Capangpangan (10-2, 7KOs) sa main event sa “Who’s Next?” Pro Boxing Series karong gabii diha sa Robinsons Galleria Cebu atrium.
Nakasugat hinuon og suliran si Tepora kay sobra siya og duha ka pounds sa gipangayong 122 lbs. weight limit atol sa official weigh-in kagahapon didto sa Robinsons Place Cebu. Nakuha ra hinuon niya ang kapin nga duha ka pounds, samtang si Capangpangan mitimbang og 120.5 lbs.
Ang 23-anyos nga si Tepora mohimo sa labing una niyang pagdepensa sa titulo human iyang nasakmit ang WBO regional belt pinaagi sa fifth round KO ni Arnel Tinampay niadtong Marso 6 didto sa Robinsons Galleria.
“Kondisyon gihapon ko og salig gihapon ko nga magpabilin akong bakus. Lisud ni siya (Capangpangan) nga kontra pero modaog ko knockout or points.”
Sa iyang bahin, si Capangpangan mibahad og usa ka upset batok ni Tepora.
“Kahibalo nako sa iyang kusog ug asa sab siya huyang. “Chance na gyud ni nako nga mahimong regional champion. Ako gyud ni paningkamotan,” matud pa ni Capangpangan nga lab-as pa sa iyang unanimous decision nga kadaugan batok ni Michael Bastasa niadtong Marso 27 didto sa Iligan City.
Sa supporting bout, si Kenny Demecillo (10-3, 7KOs) mosugal sa iyang World Boxing Federation Asia Pacific bantamweight title batok ni Eugene ‘Rambo’ Lagos (8-1 5KOs).
Atngan usab ang pro debut ni former Olympian Mark Anthony Barriga nga makigbinukbukay ni Melvin Manangquil (1-2-1, 1KO), samtang ang undefeated knockout artist nga si Christian Araneta (11-0, 9KOs) makigbatok ni Charlie Cabillal. (BANAT PALARO)
- Latest
