Barriga andam na sa iyang pro debut

CEBU, Philippines - Gamiton ni  Mark Anthony Barriga ang iyang  kasinatian pag-away sa Olympics sa pamasin nga makadaog siya alang sa labing una niyang away isip pro.

Ang idlas nga southpaw gikan sa Panabo City, Davao del Norte mohimo sa iyang professional boxing debut batok ni Melvin Manangquil sa ikaduhang edisyon sa   “Who’s Next?” Pro Boxing Series karong Sabado sa gabii diha sa Robinsons Galleria Cebu atrium.

“Ganahan gyud ko nga mag-pro. Confident ra ko ani ako debut pero di ko mosaad og knockout,” matud pa sa 23-anyos nga si Barriga atol sa  press conference kagahapon didto sa Pino Plaza.

“Sa amateur, naanad ko og paspas. Ako tan-awon kun makatabang ba ni nako sa away."

“Daku gyud og adjustment sa training kay lahi gyud ang amateur og pro, pero salig ra ko sa ako preparasyon ani nga away,”  dugang pa sa 2013 Southeast Asian Games gold medalist.

Si Barriga nga midaog  og bronze sa 2014 Asian Games nagkanayon nga inspirado siya sa mga kanhi usab Olympian nga sila si Ukrainian Vasyl Lomachenko, Guillermo Rigondeaux sa Cuba ug Chinese star Zho Shiming  nga milampos paglabang gikan sa amateur ngadto sa pro.

Si Barriga pakyas pag-angkon og medalya sa 2012 London Olympics, apan positibo siya nga mahimo siyang world champion sa umaabot.

“Mao gyud na ang goal para mahimong world champion. Kaya ra dili imposible,” segun pa niya.

Ang “Who’s Next?” Event 2 bidahan nila ni Omega Boxing Gym fighters  Jhack ‘Golden Boy’ Tepora (17-0, 12KOs) nga manalipod sa iyang WBO Youth Asia-Pacific super bantamweight title batok ni Bryan Capangpangan (10-2, 7KOs) sa Iligan City ug WBF Asia Pacific bantamweight titlist Kenny Demecillo (10-3-2,7KOs) nga mosugal sa iyang bakus kontra Rambo Lagos (8-1, 5KOs).

Sa laing mga sangka, si unbeaten light flyweight prospect Christian Araneta (11-0, 9KOs) makigsinukliay og kumo ni journeyman Charlie ‘Steelbar’ Cabilla sa Bukidnon.

Ang official weigh-in himuon karong alas-12 sa udto diha sa Robinsons Place Cebu event center. (BANAT NEWS)