Taulava gisagpa og ‘one-game’ suspension, multa pa’g P32,000

CEBU, Philippines - Usa ka adlaw human pahamtangi og bug-at nga silot sa PBA si Calvin Abueva sa Alaska Aces, laing star nga si Asi Taulava sa NLEX Road Warriors ang gisuspenso usab sa liga.

Ang PBA mipakanaog sa maong desisyon human  nila nakita nga si Taulava mituyo   pagdumbol ni San Miguel Beermen forward David Semerad atol sa ilang duwa niadtong Biyernes.

Ang 43-anyos nga si Taulava nakita sa video nga midasmag ni Semerad, human gi-foul sa nauwahi ang import sa NLEX nga si Henry Walker. Ang pagdasmag ni Taulava ni Semerad mimugna og kasikas.

Hinuon, daling miuwang ang  ilang  mga teammates aron buwagon ang duha.

Gawas sa one-game suspension, si Taulava gipamulta usab og kapin sa P32,000 sa PBA.  Si Taulava wala kaduwa batok sa  Ginebra kagabii aron serbisyohan iyang suspensiyon. (BANAT NEWS)