Beermen posas sa Enforcers

CEBU, Philippines - Mikulit ang Mahindra Enforcers sa labing nindot nilang sugod sa kasaysayan sa batan-on nilang PBA franchise human  nila patapsingi ang defending champion San Miguel Beermen 105-103 alang sa ikatulo nilang sunod-sunod nga daog sa Governors’ Cup gabii didto sa Smart Araneta Coliseum.

Atubangan sa presensiya sa ilang head coach ug Senador  nga si Manny Pacquiao, gipakita sa Enforcers nga dili tsamba ang unang duha nila ka daog human sila mibingwit og dakung isda nga mao ang Beermen.

Gidiktaran sa Mahindra ang opensa  sa nag-unang tulo ka kuwarter diin milabaw sila og siyete puntos 81-74 paingon sa final period human sa rally nga gipangulohan nila ni import James White ug KG Canaleta.

Mitubo pa sa 12 puntos ang labaw sa Enforcers, 94-82, ning higayona uban na sa iskor sa guwardiya nilang si Paolo Taha, apan dali ra usab nga mikilab ang labaw sa Mahindra dihang   milusad og kaugalingon nilang  rally ang San Miguel.

Nakan-an sa Beermen ang labaw ngadto sa uno punto, 102-103 sa tira ni AZ Reid sa katapusang 43 segundos.

Gihatagan pa og pila ka higayon ang Beermen   nga mailog ang daog, apan pakyas sila  kay mikagar ang ilang mga tira. Ang free-throws ni Chito Jaime sa  daginutong segundos maoy miselyado sa daog sa Mahindra.

Si White mirehistro og double-double pinaagi sa  34 puntos ug 11 ka rebounds, samtang si Canaleta miiskor og 17 puntos. Nakawang ang 43 puntos ni Reid  kay  nakatilaw ang Beermen sa una nilang pilde sud sa tulo ka duwa. (BANAT NEWS)