Tapales bag-ong World Champion

CEBU, Philippines - Ang Pinoy’ng boksidor nga si Marlon ‘The Nightmare’  Tapales sa Rex ‘Wakee’ Salud Stable mipakita og dalaygon nga kadasig sa dihang mibangon human matumba duha ka higayon aron sa pagpatikangkang ni two-time world champion Pungluang Sor Singyu sa Thailand sa ika-11 nga hugna dayon na sa pagsakmit sa WBO bantamweight title kagahapon didto sa Ayutthaya, Thailand.

Segun sa taho ni Dong Secuya sa Philboxing.com, si Tapales miyagyag sa mahait niyang kombinasyon, apan mura’g  tensiyonado kini sa sayong bahin sa gihulagway niyang usa ka lig-ong kandidato alang sa “Fight of the Year”.

Padayon nga gibirahan ni Tapales si Sor Singyu sa ikalimang hugna, apan ang Thai champion mibawos pinaagi sa usa ka makusog nga body shot nga maoy nakapalurag ni Tapales. Gisundan kini ni Sor Singyu og laing solidong suntok ngadto sa tiyan nga nakatumba pag-usab ni Tapales.

Sa pagtuo nga mao na kadto ang katapusan sa iyang kontra, si Sor Singyu milusad sa panapos unta niyang ataki, apan si Tapales mipakita og tumang kaisog ug kasingkasing hinungdan nga nakalingkawas kini sa peligrosong kahimtang.

Ang nakanindot ni Tapales kay human siya nakasugakod sa maong delikadong hugna, si Sor Singyu sa iyang bahin nahutdan na og lana niadtong tungora nga iya sab dayon gipahimuslan aron pagbali sa dagan sa away pabor na ngadto kaniya.

Gani pagsugod sa ikaunom nga hugna, si Tapales nga inay maluya mibalik hinuon ang iyang kusog ug kalagsik  hangtod nga nakapatama  og right cross nga nakapatikangkang ni Sor Singyu.

Gisigiha’g bira ni Tapales si Sor Singyu sa sunod nga mga hugna diin ang Thai nagsalimuang na og depensa. Human sa ika-10 nga hugna, nagkadugo na ang baba ni Sor Singyu samtang naghangos nga mibalik sa iyang corner kay hapit na mahutdan og hangin.

Sa ika-11 nga hugna, si Tapales milusad og nagbagang kombinasyon nga iyang gitapos pinaagi sa usa ka left straight nga maoy nakapalukapa sa hingpit ni Sor Singyu.

Gumikan sa maong kadaugan, si Tapales nga nagbitbit na karon og 29-2 record uban ang 12KOs, mao na karon ang ikaupat nga world champion sa Pilipinas sunod nilang Donnie ‘Ahas’ Nietes (WBO light flyweight), Nonito ‘The Filipino Flash’ Donaire Jr. (WBO bantamweight) ug Johnreil ‘Quadro Alas’ Casimero (IBF flyweight).

Siya sab  ang ikaupat nga world champion gikan sa RWS Stable sa tinamod nga Sugbuanong promoter nga si Rex  ‘Wakee’ Salud sunod sa managsuong Dodie ug Gerry Peñalosa, nga pareho nahimong two-division world champions  ug kanhi WBC flyweight champion  Malcolm ‘Eagle Eye’ Tuñacao. (BANAT NEWS)