Enforcers, Beermen ilog sa liderato
CEBU, Philippines - Wala damha nga ang Mahindra Enforcers mabutang sa maayong posisyon ug may kahigayonan sila nga masakmit ang liderato sa ilang pakigharong sa San Miguel Beermen karong adlawa sa PBA Governors’ Cup didto sa Smart Araneta Coliseum.
Ang Mahindra nga adunay 3-0 nga baraha ug ang defending champion San Miguel magsangka sa pasiunang duwa nga gikatakda sa alas-4:15 sa hapon.
Ang Enforcers gikan sa duha ka sunod-sunod nga daog diin napakita sa bag-o nilang assistant head coach Chris Gavina ang iyang katakus ug potensiyal nga ihatod ang koponan sa playoffs.
Si Gavina kasamtangang midala sa Mahindra samtang wala pa kabalik ang head coach nilang si Manny Pacquiao.
Sa pagpangulo sa ilang all-around import nga si James White, ang Mahindra makasugat og lisud nga hagit batok sa San Miguel nga bag-o lang midaog batok sa NLEX Road Warriors.
Gawas ni White, kinahanglanon sa Enforcers ang igong suporta gikan sa mga local players sama nila ni Cebuano Aldrich Ramos, LA Revilla ug KG Canaleta.
Sa ilang bahin, ang Barangay Ginebra tuyo nga mobangon human sa ilang kapildihan niadtong Domingo batok sa Alaska Aces.
Ang Ginebra makigharong sa NLEX sa main game sa alas-7 sa gabii. (BANAT NEWS)
- Latest
