All Stars, Converters 3-0 na sa E-League

CEBU, Philippines - Ang defending champion Teleperformance All Stars ug Convergys Converters mikulit sa    ikatulo nilang sunod-sunod nga daog, samtang ang Tech Mahindra Tech Mighties ug QBE Generals nagpabilin sab nga wa’y pilde sa 12th CSCC E-league men’s basketball tournament niadtong Domingo didto sa City Sports Club-Cebu gym sa Cebu Business Park.

Sa Elite Classic, si Ryan Veloso miratsada og 22 puntos uban ang unom ka rebounds ug lima ka assists, upat ka blocks ug duha ka steals alang sa Teleperformance nga nakaeskapo batok sa Telstra Boomerangs, 81-79, samtang si Kenneth Dysam mibahog og 23 puntos ug walo ka rebounds aron sab pangulohan ang Convergys ngadto sa 92-66 nga demolisyon sa SSI Warriors.

Samtang ang Teleperformance ug Convergys nagsawo sa liderato sa managsamang 3-0 nga baraha, ang Telstra nanaog ngadto sa 2-2, samtang ang SSI  nakatilaw sa ikatulo niining sagunson nga pilde.

Sa Evo League, si EJ Saavedra mikadlit og 20 puntos, siyam ka rebounds ug upat ka assists aron pagpangu sa Tech Mahindra ngadto sa 95-79 nga paglampurnas sa Contact Solutions Flying Lemurs, samtang si Johnrey Girasol mitali og 17 puntos, siyam ka rebounds ug lima ka assists sa dihang gimasaker sa QBE ang Atos Falcons, 94-61.

Ang Tech Mahindra nagsolo karon sa liderato dala ang 4-0 record ug nagsunod ang QBA nga adunay  3-0. (BANAT PALARO)