Top seeds nanghawod sa Shell Cebu chessfest

CEBU, Philippines - Ang top seeds nga sila si Chris Aldritz Pondoyo, Jerish John Velarde ug Jethro Esplanada maoy naghari sa tagsa-tagsa nila ka dibisyon sa Shell National Youth Active Chess Championship-Visayas leg nga natapos niadtong Domingo didto sa SM City-Cebu Event Centre.

Human gipakgang ang kanhi lider nga si Andrew Basilgo sa ikaunom nga hugna, si Pondoyo  sa  University of Cebu  (UC) miharos og pilde nilang Remigio Galenzoga  III, Philgymn Villajuan ug Marc Villarojo aron pagsakmit sa juniors title (11-13 age bracket) bitbit ang labing taas nga 8.5 puntos.

Si Velarde sa Marie Ernestine School maoy kampiyon sa kiddies division, samtang si Esplanada mipilde sa kauban niyang varsity sa  University of San Jose-Recoletos nga si Allan Pason aron pagdominar sa seniors division.

Nagmaya sab sila si Alphecca Gonzales sa Dunggoan Elementary School (DES) ug Laila Nadera sa University of San Carlos (USC) gumikan kay sila maoy top finishers sa mga babayeng partisipante.

Si Gonzales maoy midaog sa ladies 7-12 age division, samtang si Nadera maoy hara sa 17-20 (seniors) category.

Gumikan niini, silang tanan nakaangkon og luna sa national finals sa maong tinuig nga torneyo nga gikatakda karong Oktubre 1-2 sa SM Megamall didto sa kaulohan. (BANAT PALARO)