RR Garcia maoy bitoon sa Star
CEBU, Philippines - Si RR Garcia maoy labing hayag nga bitoon sa dihang gikulit sa Star Hotshots ang labing una nilang daog sa PBA Governors’ Cup.
Miduwa sa ikaupat niyang PBA team sud sa tulo ka tuig, ang 5-foot-10 nga guwardiya gikan sa Far Eastern University maoy migiya sa Hotshots ngadto sa 105-102 nga kadaugan sud sa overtime batok sa GlobalPort aron pagpakgang sa duha ka sunod-sunod nilang pilde.
Si Garcia miyagyag sa labing nindot niyang duwa sul-ot ang uniporme sa Star human siya mipasud og 11 sa 13 niya ka itsada aron pagtapos og 26 puntos sa mabulokon niyang salida niadtong Domingo didto sa Smart Araneta Coliseum.
Ang 26-anyos nga si Garcia mipuntos og otso sa overtime, apil na ang duha ka krusyal nga free throws gikan sa foul ni Stanley Pringle nga maoy nagselyado sa unang daog sa Star ning komperensiyaha.
Gumikan niini, siya maoy gipasidunggang “Accel-PBA Press Corps Player of the Week” diin iyang gipilde silang John Paul Erram sa Blackwater, Gabe Norwood sa Rain or Shine ug Chris Banchero sa Alaska. (BANAT PALARO)
- Latest
