China mikastigo sa Batang Gilas

CEBU, Philippines - Wa musalir ang paningkamot sa Philippine youth national team human sila gilat-an sa China, 66-95, sa FIBA Asia U18 Championship kagahapon didto sa Tehran Iran.

Mipatigbabaw ang mga Tsino nga adunay average height nga 6-foot-6 batok sa mas mubo nga Gilas. Si Jolo Mendoza maoy nangulo sa Batang Gilas sa iyang 19 puntos, samtang si JV Gallego miiskor og 12 puntos.

Gipakita sa defending champion ang ilang kadominante dihang ilang gibombahan ang Batang Gilas, 15-0 sa first period ug gikan didto wala na karekober pa ang mga Pinoy cagers.

Gilupig usab sa China ang Gilas sa rebounding sa ilang 61 itandi sa 26 sa mga Pinoy, samtang mipasud usab sila og 14 ka tres nga labaw sa unom lang nga gipatusak sa Batang Gilas.

Ang mga Pinoy tuyo nga makabawi aron isaka ilang record sa 2-2 ugmang adlawa batok sa Thailand. (BANAT NEWS)