Kyocera 4-0 na sa E-League

CEBU, Philippines - Si Ariel Ramonito Edera nagmangtas aron pagtuboy sa Kyocera Frontiers ngadto sa 80-75 nga kadaogan batok sa The Results Spartans, nga maoy ikaupat nilang sunod-sunod ubos sa Evo League sa 12th CSCC E-League men's basketball tournament niadtong Sabado didto sa City Sports Club-Cebu gym.       

Mipabuto og 30 puntos si Edera uban ang walo ka rebounds, tulo ka blocks ug tulo ka assists sa Kyocera. Miabag kaniya si Winston Stephen Panal uban sa iyang usa ka dosenang puntos.

Sa laing duwa sa Evo League, si Jonas Panerio miratsada og 26 puntos uban ang unom ka rebounds, tulo ka assists ug tulo ka steals alang sa Author Solutions, Inc. Hardbacks nga mipakgang sa Dynino Raptors, 62-56. Ang ASI ug Dynino pareho na karong nagtangag og 2-0 nga baraha.

Sa Elite Classic, si Esrom Cuizon mipatuasik og 20 puntos, unom ka rebounds ug lima ka assists sa 78-69 nga kalampusan sa ePerformax Reds batok sa Wipro Tigers, samtang si Juna Marion Misa mitali og 16 puntos, unom ka assists ug lima ka rebounds sa dihang gitukob sa Accenture Sharks ang Lexmark Stallions, 74-55. (EBV) (BANAT NEWS)