Star midaog na gyud
CEBU, Philippines - Milampos ang Star Hotshots sa pagputol sa ilang losing-streak, apan sa lisud nga paagi dihang nanginahanglan pa sila nga moagi og overtime aron mapukan ang GlobalPort Batang Pier,105-102 , kagabii sa PBA Governors' Cup didto sa Smart Araneta Coliseum.
Ang Hotshots nga misakmit sa una nilang daog sa tulo ka duwa, misandig sa ilang import nga si Marqus Blakely nga adunay 24 puntos ug 22 ka rebounds, apan mas nakatabang sa ilang kadaugan mao ang pagsidlak sa bag-ong sakop sa koponan nga si RR Garcia kinsa nangulo sa mga locals sa iyang 26 puntos.
Si Peter Jun Simon mihimo og 15 puntos, samtang si Mark Barroca mitampo og 11 puntos.
Sama sa Hotshots, ang Batang Pier tinguha usab nga makatilaw sa una nilang daog rasun nga nahimong sikit ug kulbahinam ang maong away sa pagsugod pa lang diin labaw og dos puntos ang GlobalPort, 44-42 sa halftime.
Gikan didto init nga nagbinayloay og puntos ang duha ka koponan hangtud nga naundang sa makadiyot ang duwa human mawad-an og kuryente ang Smart Araneta Coliseum.
Nakabintaha ang GlobalPort human nanud ang mga tira sa ilang import nga si Mike Glover, samtang nakaiskor usab sila si Terrence Romeo ug Stanley Pringle aron mailog ang labaw 90-87 sa katapusang 36.7 segundos.
Apan ang Star wala mawad-i og paglaum ug sa paningkamot ni Garcia nabawi nila ang labaw. Ang mga free-throws usab ni Garcia ang nahimong yawi sa kadaugan sa Hotshots
Ang GlobalPort nga natagak sa 0-3 nga baraha gipangulohan nila ni Glover ug Romeo nga adunay 27 puntos matag usa, samtang si Pringle midugang og 20 puntos. (BANAT NEWS)
- Latest