Carcar Downhill Challenge mosikad karong adlawa

CEBU, Philippines - Adunay 121 ka mga seklista ang magtigi sa 2016 Carcar Downhill Challenge nga kumbatihan   karong adlawa didto sa  dakbayan sa Carcar habagatang bahin sa  Sugbo.
Gawas sa mga Sugbuanon, may mga entrante sab nga nagagikan sa nagkadaiyang dapit sa Kabisay-an ug Mindanao. Misamot   kadaghan ang mga partisipante gumikan kay apil man ang mga babaye ubos sa feminine category.

Lain pang mga dibisyon nga kumbatihan mao ang open, idols, intermediate ug hardtail.
Si JR Barba, ang hari sa downhill karon sa nasud, maoy nag-una sa listahan sa mga lig-ong contenders sa open class.
 

Apan gipaabot nga magsagubang siya og malisud nga hagit sa iyang ig-agaw ug SEA Games medalist Joey Barba ingon man nilang Galvin Galan, Cyril Bayawa, Carlmil Oliveros, Dave Chiong, Dongkey Sanchez, Emmanuel Cu, Christopher Leo Voss, Maximo Villarta, Arnel Abella, Junrel Panerio ug Tom Michael Tan. (BANAT PALARO)