Kusog ni Araneta masukod sa “Who’s Next?” Event 2
CEBU, Philippines - Gusto na ipakita ni flyweight contender Christian Araneta nga usa siya sa mga pambatong boksidor sa Omega Boxing Gym sa dihang panalipdan niya ang wa’y pilde niyang rekord batok ni journeyman Charlie ‘Steelbar’ Cabilla sa Bukidnon sa ikaduhang edisyon sa “Who’s Next?” Pro Boxing Series karong Hulyo 30 diha sa Robinsons Galleria Cebu atrium.
Hinay-hinay nga nakamugna og pangan si Araneta isip knockout artist human gitumba ang siyam sa 11 niya ka mga kontra apan ang tinud-anay niyang kusog masukod sa iya unyang pakigharong ni Cabilla, nga beterano sa 36 na ka away dinhi ug gawas sa nasud.
“Cabilla will be the true test of Araneta's power,” matud pa ni Omega Pro Sports International Vice President Chad E. Cañares. "A lot is at stake for Araneta in this fight. Aside from keeping his clean record, he also aims to boost his stock as one of our high valued fighters."
Ang panag-abot nilang Araneta ug Cabilla usa sa mga angayan atngan nga sangka sa gikahinaman nga double championship event nga gipasiugdahan sa Omega Pro Sports International Promotions ug International Pharmaceuticals, Inc. inabagan sa 2016 Hyundai Tucson.
Sa main event, si super bantamweight contender Jack ‘The Golden Boy’ Tepora (17-0, 12KOs) manalipod sa labing unang higayon sa iyang World Boxing Organization Asia-Pacific Youth title batok sa kababayan niyang si Bryan Capangpangan (10-2-1, 7KOs).
Ang 23-anyos nga si Tepora misakmit sa WBO AsPac title human gipatikangkang sa ikalimang hugna si Arnel Tinampay atol sa labing unang “Who’s Next?” boxing niadtong Marso 6 didto sa Robinsons Galleria.
Samtang si Kenny Demecillo (10-3-2, 7KOs) modepensa sa iyang trono isip World Boxing Federation Asia Pacific bantamweight champion batok ni Eugene ‘Rambo’ Lagos (8-1-2, 5KOs). (BANAT PALARO)
- Latest
