Dili na kapugngan
CEBU, Philippines - Daw dili na kapugngan ang paghari sa Pilipinas sa dihang mihakot kini og 151 ka medalya human sa ikaduhang adlaw sa kompetisyon sa 14th World Eskrima Kali Arnis Federation (WEKAF) Championship kagahapon didto sa J Centre Mall Convention Hall A.S. Fortuna St. sa Barangay Bakilid, dakbayan sa Mandaue.
Ang mga Pinoy’ng arnisador miarangkada og maayo sa ilang mga kontra human kini mikabkab og 60 ka gold, 54 ka silver ug 37 ka bronze medals nga maoy naghimo kanilang “virtual champions” sa maong lima ka adlaw nga torneyo nga gisalmotan og dul-an sa 500 ka mga entrante gikan sa 25 ka nasud lukop kalibotan.
Sila si Henry Talledo, Sebastian Villanueva, Trixie Lofranco ug Rhonda Lucero sa Team Philippines apil sa top 10 fighters human mikabkab og tagtulo ka bulawang medalya.
Ang defending champion United States nahimutang sa ikaduha nga dapit bitbit ang 38 ka golds, 27 ka silvers ug 27 sab ka bronzes, samtang ang Japan maoy mikapyot sa ikatulo uban sa ilang 19-8-12 medal tally.
Naglangkob sa top 10 mao ang Canada (10-10-10), Australia (9-2-10), Reunion Island of France (4-10-12), Hungary (4-6-9), Italy (3-3-5), United Kingdom (1-3-3) ug Liechtenstein (1-2-3).
Sa laing bahin, ipahigayon karong gabii ang closing ug awarding ceremony diha sa Fort San Pedro. Gawas sa mga mananaog, koronahan sab ang tulo ka importanteng personalidad nga maoy nag-usab sa arnis/eskrima gikan sa usa ka brutal nga huego todo nga kumbati ngadto sa usa ka desente, sibilisado ug makalingaw nga matang sa isport.
Sila mao si Atty. Amorito Cañete ug Dionisio ‘Diony’ Cañete, ang Supreme Grandmaster ug chairman emeritus sa WEKAF ug Nonito ‘Tatay Dodong’ Limchua nga mao karon ang presidente sa CCTN 47.
Pasidunggan sab silang Grandmasters Arnulfo ‘Dong’ Cuesta ug Fred Bandalan nga nakatabang sab pagsabwag ning Pinoy martial arts ngadto sa Amerika. (BANAT PALARO)
- Latest