Lassiter miluwas sa San Miguel
CEBU, Philippines - Usa ka go-ahead three-point shot ang gihimo ni Marcio Lassiter sa nahabilin nga sayes segundos aron mailog sa San Miguel Beermen ang 94-93 nga kadaugan batok sa NLEX Road Warriors sa PBA Governors’ Cup kagabii didto sa Smart Araneta Coliseum.
Dumadaog na unta ang NLEX dihang milabaw sila og dos puntos, 93-91 human sa tira ni Asi Taulava sa katapusang 27 segundos sa duwa, apan ang tres ni Lassiter human sa time-out maoy mipahugno kanila.
Aduna lang siya’y otso puntos sa tibuok duwa, apan si Lassiter kinsa mihaw-as gikan sa bench mipakita sa iyang katirador human niya gipasud ang mahinungdanong itsa nga mihatag sa Beermen sa ikaduhang sunod-sunod nga kadaugan.
Giusikan sa Beermen ang ilang 17 puntos nga labaw sa first half, 60-43. Naglawig ang Road Warriors sa katapusang tres minutos, 91-86 human sa init nga opensa ni Henry Walker.
Si Walker mirehistro og game-high 33 puntos ug iyang nalupigan sa scoring si Beermen import Arizona Reid nga adunay 23 puntos hinuon suportado siya gikan sa iyang kaubanan hinungdan nga midaog ang San Miguel.
Si Alex Cabagnot miiskor og 19 puntos, samtang si JuneMar Fajardo mitampo og 16 puntos alang sa defending champion. (BANAT PALARO)
- Latest