HLY padayong nag-una sa liderato sa Power Forty President’s cup 2016
CEBU, Philippines - Nagpakita’g gilas si Eric Espinosa aron pangulohan ang HLY nga miparot sa Team Rama, 83-75 sa Power Forty Basketball League 2016 President’s Cup niadtong Martes didto sa Inayawan Sports Complex, siyudad sa Sugbo.
Si Espinosa mikabkab og 28 puntos, gialalayan sab siya ni Alex Mercado nga mikubkob og 14 puntos sa HLY nga padayong nag-una sa standing sa ilang 4-1 nga baraha.
Ang Team Rama ni Romy Rama nga adunay 3-2 record gipangulohan sab ni Rickboy Nacario nga mikadlit og 25 puntos, gisundan ni Jonathan Diaz nga mitimbre’g 20 puntos ug Rey Abarquez nga mitimang og 11 puntos.
Gamay ra unta ang labaw sa HLY ni playing team manager Atty. Flor Yosores, apan ila kining naprotektahan hangtod sa katapusang pitik sa orasan.
Sa laing duwa, wala kapugngi ang pagmangtas ni Robert Abasolo diin mipabuhagay kini og 53 puntos sa AMBL nga midemolis sa Water Market, 104-85.
Ang 53 puntos ni Abasolo maoy labing daku sa kasaysayan sa liga sa kasamtangan. Mihimo sab og double digits si Glen Birao pinaagi sa iyang 10 puntos.
Gipangulohan ni Bodak Tantiado ang Water Market nga mikandos og 19 puntos, gisundan ni Michael Arias sa iyang 17 puntos ug nilang Joel Cañete ug Joel Jaca sa ilang 15 ug 11 puntos.
Ang AMBL ni Alan Lim adunay 1-2 record, samtang ang Water Market ni Vez Eleguin mihakot og 1-3 nga baraha ning maong liga ubos sa bendisyon sa ilang presidente nga si Lando Almojallas sa abag ni Dome Ozon ug commissioner Edwin Dejacto Sr. (BANAT PALARO)
- Latest
