JP Faustino nagmangtas
CEBU, Philippines - Nagmangtas og maayo si JP Faustino ug mipahaguros siya’g 41 puntos aron mangulo sa opensa sa Stickerworld nga mipaksit sa SSK Abelgas, 97-89 sa 3rd Conference sa Bond of Masters Basketball League sa miaging gabii didto sa Alta Vista gym sa Pardo, dakbayan sa Sugbo.
Matinabangon sab ang iyang igsuon nga si Henry Faustino nga mitunol og 14 puntos sa Stickerworld nga miilog sa momentum sa second half aron moposte’g 2-3 win-loss record. Sila si Along Cañete ug King Zianra mitampo’g 11 puntos matag usa.
Si Echang Royeras milansang og 20 puntos aron sab mangu sa napildeng SSK Abelgas. Sila si Clark ug Clifford Abelgas nagkumboya’g 30 puntos sa SSK Abelgas.
Sa pasiunang duwa, si JC Repunte mipatuasik og 25 puntos alang sa Wellas Fresh Chicken nga mibihag sa Minute Burger, 79-70.
Wala sab paalkansi silang Benjie Paglinawan, Ryan Banal, Opel Abellanosa ug Galen Gabiana nga pareho sab miiskor og double figures.
Sila si Jets Melijor ug Anthony Alce lang ang miiskor og double digits sa Minute Burger nga wala pa gyud makaiskor og daog sa lima nila ka duwa.
Ang liga ubos sa pagtugot sa ilang presidente nga si Jun ‘Master’ Tan gipadagan ni Edwin ‘Paw’ Dejacto Jr. (BANAT PALARO)
- Latest
