Warriors buhi pa
CEBU, Philippines - Nakaginhawa pa ang Golden State Warriors human gibuntog ang Oklahoma City Thunder, 120-111 sa Game-5 sa ilang “best-of-seven” NBA Western finals kagahapon didto sa Oracle Arena sa Oakland, California.
Si Stephen Curry mipatuasik og 31 puntos uban ang unom ka assists alang sa defending champion nga Warriors nga nakaangkon pa og laing kinabuhi.
Midugang og 27 puntos si Klay Thompson sa Warriors, apan alkanse gihapon sila sa serye, 2-3 ug nameligro nga matagak gumikan kay ang Game-6 karong Domingo adto man sa Oklahoma.
Si Kevin Durant miratsada og 40 puntos, samtang si Russell Westbrook mikulit og 31 puntos, walo ka assists, pito ka rebounds ug lima ka steals sa Thunder nga naglaraw nga makasud sa NBA Finals sa ikalimang higayon sa ilang prangkisa ug unang higayon sukad sila mibalhin gikan sa Seattle.
Ang Thunder igo lamang nakasikit sa iskor nga 103-98 human sa 3-pointer ni Durant sa nahibilin nga 4:34 sa duwa gumikan kay sila si Curry ug kaubanan miarangkada dayon aron pagsalbar sa Warriors.
Nakigbisog sa milabay’ng duha ka duwa, si Draymond Green mitali og 11 puntos ug 13 ka rebounds usa ka adlaw human siya makadawat og makapadasig nga mga pulong gikan ni Kobe Bryant sa telepono.
Wala sab magpabitin ang Australyanong sentro sa Warriors nga si Andrew Bogut nga mikimada og playoff career-high 15 puntos ug 14 ka rebounds. (BANAT NEWS)
- Latest
