Casimero misakmit sa IBF title
CEBU, Philippines - Makalisang nga panimalos maoy gihimo ni John Riel ‘Cuadro Alas’ Casimero (22-3, 14KOs) batok ni Amnat Ruenroeng (17-1, 5KOs) human iyang gipalukapa ang kanhi wa’y pildeng Thai champion sa ikaupat nga hugna aron pagsakmit sa IBF flyweight title niadtong Miyerkules sa gabii didto saDiamond Court sa Beijing, China.
Gitumba ni Casimero si Ruenroeng duha ka higayon ginamit ang brutal niyang mga suntok sa ikaupat nga hugna nga maoy nakapaaghat ni reperi Tony Weeks pag-undang sa away sa oras nga 2:10.
Ang garbo sa Ormoc City mipakamang ni Ruenroeng sa unang higayon gamit ang counter left hook ug iya kining gisundan og makusog nga body shot nga maoy nakapaluko sa hingpit sa iyang kontra.
Tam-is kaayo ang maong bawos ni Casimero nga gipilde ni Ruenroeng pinaagi sa desisyon sa una nilang engkuwentro dul-an sa usa ka tuig na ang milabay nga puwerteng hugawa kay si Ruenroeng nagpunay og gakus ug nagsige og panukmod nga imong masaypan nga siya nakig-wrestling.
Atol sa ilang rematch, si Ruenroeng nahuboan nang daan sa iyang bakus kay milapas kini og lima ka libras sa regular nga timbang. Wala sab makakuha og saktong timbang si Casimero, apan gitugotan gihapon sa IBF nga ipadayon ang ilang sangka isip title fight.
Malipayon sa kadaugan sa iyang boksingero, si international promoter/manager Sampson Lewkowicz mipadangat dayon sa iyang pahalipay ngadto ni Casimero nga usa na karon ka two-division world champion.
Si Casimero kanhi naghari isip IBF light flyweight champion sud sa dul-an sa tulo ka tuig.
“John Riel has gotten this out of the way now. My congratulations to him and to the people of the Philippines. He is now their third current world champion and is very proud to represent them. Next we want to unify against Chocolatito,” matud pa ni Lewkowicz, diin ang gipasabot niini mao ang wa’y pildeng pound-for-pound king nga si Roman Gonzalez. (BANAT NEWS)
- Latest
