Gilubong tagaliog
CEBU, Philippines - Gilubong og tagaliog sa Cleveland Cavaliers ang karibal niining Toronto Raptors, 116-78 aron pag-angkon og 3-2 nga bentaha sa ilang “best-of-seven” NBA Eastern Conference finals series kagahapon didto sa Quicken Loans Arena sa Cleveland, Ohio.
Si LebBron James mitali og 23 puntos, samtang si Kevin Love miayag og 25 puntos sa ilang paglubong sa Raptors.
Ang Cavs nagkinahanglan na lang og usa ka daog aron hingpit nga mobalik sa NBA Finals. Posible na nilang tapuson ang serye sa Game-6 karong Sabado, apan angayan sila mangandam alang sa usa ka dakung gubat didto sa teritoryo sa Raptors.
Si James midugang og walo ka assists ug unom ka rebounds sud sa 31 ka minutos. Wala na siya moduwa gikan sa naghinapos nga bahin sa ikatulong kuwarter diin niadtong tungora gilubong na nila og tagaliog ang Raptors.
Si Kyrie Irving miamot og 23 puntos. Silang tulo nila James ug Love mipanit sa Raptors sa first half pa lang daan, 43-34 nga maoy labing daku sa kasaysayan sa NBA conference finals.
Si DeMar DeRozan miiskor og 14 puntos ug si Kyle Lowry mipuntos lang og 13 alang sa Raptors nga naminghoy human gibirahan og duha ka sunod-sunod nga higayon ang Raptors. Wala gyud kaugpo ang Raptors kay hasta si Bismack Biyombo nalimitahan lamang og upat ka rebounds human milangkat og 40 sa miagi nilang duha ka duwa.
Human mibulhot ngadto sa 37-19 nga bentaha, ang Cavaliers padayong nagmangtas dayon na sa pag-inat sa ilang labaw ngadto sa 31 puntos sa halftime nga maoy nakapaluya sa Raptors. (BANAT NEWS)
- Latest
