Nietes gibaharan ni Garcia

BACOLOD CITY, Philippines – ‘Say goodbye to your title. (Panamilit nang daan sa imong titulo).'

Mao kini ang wa’y pamilok nga tubag sa Mehikanong si Raul  ‘Rayito’ Garcia (36-3-1) sa dihang gipangayoan sa katapusan niyang mensahe ngadto ni ALA Boxing Gym star Donnie ‘Ahas’ Nietes (37-1-4, 21KOs).

Si Garcia mipasalig nga buhaton niya ang tanan kutob sa iyang mahimo aron palagputon si Nietes sa trono nga dugay na kaayo niining gilumloman.

Matud pa ni Garcia nga misantop gyud sa iyang huna-huna nga siya maoy makatangtang sa walo ka tuig nang paghari ni Nietes mao nang siya nanulong dinhi aron hagiton ang Pinoy’ng kampiyon.

Si Garcia gikatakda nga mohagit ni Nietes alang sa WBO light flyweight title sa main event sa “Pinoy Pride 36: A Legend in the Making” fight card karong Sabado sa gabii dinhi sa University of St. La Salle Coliseum.

Gawas sa kalibotanhong dungog, si Garcia nagpangagot sab nga makabawos ni Nietes nga mipilde sa iyang kaluha nga si Ramon Garcia Hirales aron pagdaog sa WBO title lima na ka tuig ang milabay sa susamang binyu.

Sa iyang bahin, si Nietes wala mabalaka sa mga malaha nga pamahayag ni Garcia nga mibahad pa gani nga pakamangon siya niini sud sa lima ka hugna.

“Let him do what he want because I will just do my thing when we’re already inside the ring,” matud pang Nietes. 

  “I know that he’s up for revenge because I defeated his twin brother but I’m ready for whatever he brings. I prepared to go for 12 rounds but if chance comes along the way, I won’t hesitate to go for a knockout,” dugang pa sa garbo sa Murcia, Negros Occidental. (BANAT NEWS)