Thunder, 3-1 na
CEBU, Philippines - Migaling na sab og triple-double si Russell Westbrook, samtang si Kevin Durant mipatuasik og 26 puntos ug 11 ka rebounds sa dihang gipilde na sab sa Oklahoma City Thunder ang defending champion Golden State Warriors, 118-94 aron pagposte og solidong 3-1 bentaha sa ilang “best-of-seven” NBA Western Conference finals kagahapon didto sa Chesapeake Energy Arena sa Oklahoma.
Grabe ang pagmangtas ni Westbrook diin mirehistro siya og 36 puntos, 11 ka rebounds ug 11 ka assists sa Thunder nga mahimo nang moabante sa NBA Finals kun ugaling ilang mausban ang Warriors sa Game-5 karong Biyernes. Lisud hinuon kini nga tahas alang kanila gumikan kay ang duwa adto na man sa Oracle Arena, ang korte sa Warriors.
Timaan sa balanse nilang opensa, sila si Serge Ibaka ug Andre Robertson pulos mitali og 17 puntos, samtang si Steven Adams miamot og 11 puntos ug pito ka rebounds sa Thunder nga mipatilaw sa Warriors sa labing una niining sunod-sunod nga pilde karon nga season.
Ang Thunder naglabaw lamang og kuwatro puntos sa first period, 30-26, apan miratsada kini sa ikaduhang kuwarter aron pagposte og 72-53 nga bentaha sa halftime.
Ubos sa pagpanginit ni Klay Thompson, ang Warriors nakasikit ngadto na lang sa sayes puntos, apan dali nga gibawi sa Thunder ang ilang double-digit nga labaw, 94-82, dayon na ngadto sa pagpahilom sa ilang kontra.
Kulatado kaayo ang Warriors nga maorag misurender na kini human gipalingkod ang ilang mga starters sa nahibilin nga tres minutos sa duwa.
Si Thompson mitapos og 26 puntos, apan si back-to-back NBA MVP Stephen Curry nabugnaw na sab diin mihipos lamang kini og 19 puntos human unom lamang ang napasud sa 20 niya ka tirada.
Bisan tuod og takilid na kaayo sila, may paglaum pa ang Warriors gumikan kay sa kasaysayan sa NBA duna na may siyam ka teams nga nakabangon human maalkansi og 1-3 aron pagdaog sa playoff series sa baraha nga 4-3. (BANAT NEWS)
- Latest
