Casimero-Ruenroeng ‘rematch’
CEBU, Philippines - Wa’y laing tuyo si kanhi Pinoy world champion John Riel ‘Quadro Alas’ Casimero (21-3, 13KOs) kun dili ang pagpanimawos sa iyang paghagit og usab sa wa’y pildeng IBF flyweight champion Anmat Ruenroeng (17-0, 5KOs) sa Thailand sa dumot nilang ‘rematch’ karong adlawa didto sa Diamond Court sa Beijing, China.
Ngil-ad kaayo ang una nilang engkuwentro didto sa tugkaran ni Ruenroeng dul-an sa usa ka tuig na ang milabay diin ang garbo sa dakbayan sa Ormoc napilde pinaagi sa kuwestiyonable kaayong desisyon.
Giwarningan ni reperi Larry Doggett si Ruenroeng lima ka higayon gumikan sa pagpunay niini og panggunit ug pagtukmod ni Casimero sa salawayon kaayo niyang estilo nga imong masaypan nga miduwa siya og wrestling.
Gumikan sa grabe nga kontrobersiya nga namugna sa maong sangka, napugos ang IBF pagmando og ‘return bout’ ug nasuwertian pa si Casimero gumikan kay adto pa gyud sa neutral nga dapit himuon ang away.
Si Casimero kanhi naghupot sa interim IBF 108-pound belt human gipakatug si Argentinian Luis Alberto Lazarte sa ika-10 nga hugna niadtong Pebrero 10, 2012 didto sa Club Once Unidos sa Buenos Aires, Argentina.
Human giangkon ang regular title pinaagi sa pagbuntog ni Pedro Gueverra upat ka bulan ang milabay didto sa Mexico, si Casimero nakapanalipod sa iyang trono tulo ka higayon apan sa kadugayan nahuboan kini sa iyang bakus gumikan sa problema sa timbang.
Sa iyang pagkatkat sa flyweight, si Casimero miaway dayon sa world title, apan gipilde kini ni Ruenroeng. Mahug nga wa’y nada ang ilang engkuwentro tungod sa kahugaw sa inawayan ni Ruenroeng nga miresulta ngadto sa usa ka ‘rematch’. (BANAT NEWS)
- Latest