Gilas cadet midaog dayon sa 2016 seaba

CEBU, Philippines - Gilat-an sa Gilas Pilipinas cadet ang kontra niining  Malaysia, 108-84, sa ilang opener sa 2016 SEABA Stankovic Cup sa miaging gabii didto sa Bangkok, Thailand.

Gibarugan ni Tropang TNT rookie Troy Rosario nga siya ang mahimong sinaligan sa national team human siya miiskor og 19 puntos uban ang walo ka rebounds.

Ang mga collegiate standout nga sila si Mac Belo ug Mike Tolomia mitampo og 16 ug 13 puntos matag usa, samtang ang Gilas cadet mainstay nga si Kevin Ferrer adunay usa ka dosenang puntos.

Labaw lang og nuybe puntos ang Gilas, 29-20 sa first period, apan hinay-hinay kini nga giinat ngadto sa 20 puntos atol sa third quarter ug wala gyud nila hatagi og higayon ang  Malaysian cager nga makasikit.  (BANAT PALARO)